Roma, İtaliya, 19 fevral 2026-cı il.
Bvlgari brendi Dua Lipanı yeni qlobal ambassadoru elan etməkdən məmnunluq duyur.
Öz nəslinin ən təsirli sənətçilərindən biri olan Dua Lipa bədii azadlıq, səmimilik və yaradıcılıq bütövlüyünə dərin sadiqliklə səciyyələnən parlaq beynəlxalq karyera qurub. Çoxsaylı “Qremmi” və BRIT mükafatlarının laureatı olan, dünya üzrə milyardlarla dinlənmə göstəricisinə sahib sənətçi müasir mədəniyyətin güclü və təsirli səsinə çevrilib.
“Dua Lipa hüquq və azadlıqların genişləndirilməsi ilə bağlı müasir baxışı təcəssüm etdirir və bu baxış Bvlgari-nin dəyərləri ilə dərin şəkildə səsləşir. O, uğur anlayışını yenidən şərh edən güclü və özünəməxsus səsdir və istedadı ilə özünəinamı sayəsində dünyanın hər yerində qadınları daxili güclərini üzə çıxarmağa ruhlandırır. Biz onu qlobal brend ambassadoru kimi böyük qürurla salamlayırıq və birlikdə bu həyəcanverici yeni səhifəyə başlayırıq”, – deyə Bvlgari şirkətinin baş icraçı direktorunun müavini və 1 iyul 2026-cı ildən etibarən baş icraçı direktor səlahiyyətlərini icra edəcək Laura Burdeze bildirir.
“Bvlgari kimi ikonaya çevrilmiş bir brendlə əməkdaşlıq etmək inanılmazdır. Özündə özünəinamı, yaradıcılığı və müasir qadınlığı birləşdirən bir Evə qoşulmaqdan böyük sevinc və həyəcan hissi keçirirəm. Onun zinət əşyaları obrazı hər zaman mükəmməl şəkildə tamamlayaraq onu həqiqətən canlı və parlaq edir”, – deyə Dua Lipa qeyd edir.
